Koleksi Umpasa Yang Sering Dipakai Di Pesta Pernikahan Adat

Sumber : https://www.tobatabo.com/

 

1)
Napuran di bagas tagan
Ulos di bagas tondi
Hami mangulosi badan
Debata mangulosi tondi
 
2)
Di ginjang do arirang
Di toru panggaruan
Unang di hatai sirang
Molo dung marhajabuan
 
Boras sipirni tondi
Binuat sian piring
Debata ma na manggohi
Tuhan Jesus ma mangiring-iring
 
Binahen pe umpasa
Nidok pasu-pasuan
Tangiang mai tu Debata
Asa denggan hamu di hangoluan
 
 
3)
Jong-jong rumah ijuk
Mandompakhon rumah gorga
Sai tubu anak na bisuk
Dohot boru na malo marroha
 
Sahat-sahat ni solu
Sai sahat ma tu bottean
Sai sahat sude hita mangolu
Sai sahat ma hita tu panggabean, sahat tu parhorasan
 
4)
Bintang na rimiris ma,
tu ombun na sumorop
Asa anak pe antong di hamu riris,
boru pe antong torop
 
Tubuan laklak ma,
tubuan sikkoru di dolok ni Purbatua
Sai tubuan anak, tubuan boru ma hamu,
donganmu sarimatua
 
Pir ma pongki,
bahul-bahul pansalongan
Sai pir ma tondimuna,
jala tongtong hamu masihaholongan
 
Pinantik hujur tu jolo ni tapian
Tusi hamu mangalangka,
tusi ma dapot parsaulian
 
Pangkat-hotang.
Tu dia hamu mangalangka,
tusi ma dapot pangomoan
 
Tangki jala hualang, garinggang jala garege
Tubuan anak ma hamu, partahi jala ulubalang
Tubuan boru par-mas jala pareme.
 
Tubu ma hariara, di tonga-tonga ni huta
Sai tubu ma anak dohot borumu
Na mora jala na martua
 
5)
Andor halukka ma patogu-togu lombu
Saur ma hamu matua, patogu-togu pahompu
 
Eme sitamba-tua ma parlinggoman ni siborok
Tuhanta Debata do silehon tua, sude ma hita on diparorot
 
Tubu ma dingin-dingin di tonga-tonga ni huta
Saur ma hita madingin, tumangkas hita mamora
 
Sitorop ma dangkana, sitorop rantingna
Sitorop ma nang bulungna
Sai torop ma hahana, torop anggina
Torop ma nang boruna