UMPASA NI NA LAHO MARSIRANG ( PERPISAHAN )

 

1) Napuran tano-tano, rangging marsiranggongan;
Badan ta i padao-dao, tondita i marsigomgoman.

 

2) Pidong sitapi-tapi, habang diatas hauma;
Horas ma hamu na hupaborhat hami, Horas hami na tininggalhonmuna.

 

3) Manuk ni pealangge, hotek-hotek laho marpira;
Sirang na mar ale-ale, lobianan matean ina.

 

4) Dolok ni Panampahan, tondongkon ni Tarabunga;
Sai horas ma hamu dipardalanan, songoni dung sahat tu inganan muna.

 

5) Tombak ni Sipinggan, di dolok ni Sitapongan;
Di dia pe hita tinggal, sai tong ma hita masihaholongan.

 

6) Eme sitambatua, parlinggoman ni siborok;
Amanta Debata do silehon tua, sai luhutna ma hita diparorot.

 

7) Mangerbang bunga-bunga, ditiur ni mata ni ari;
Selamat jalan ma dihamuna, selamat tinggal ma di hami.

Read More

UMPASA SILUP-SILUPAN

 

1) Tangkas pe jabu suhat, tangkasan do jabu bona;
Tangkas ma namaduma, tangkas ma nang mamora.

 

2) Ruma inon gopas pe, pinagopas ni gulanggulang;
Ise pe boru tinodo ni ibebere, hot do i boru ni tulang.

 

3) Bolon tiang ni ruma, umbolon do tiang ni sopo;
Matangkang ma juara natua-tua, tu bonggalna ma naumposo.

 

4) Tarup ijuk jabu nami,ri namasak panoloti;
Pandokhon ni soroniari, so holing marsiak bagi.

 

5) Dibungkulan ni ruma i, parasaran ni borong-borong;
Bulan na diginjang i, pardomuan ni simalolong.

 

6) Jongjong ruma ijuk, maradophon ruma gorga;
Tubu anak nabisuk, dohot boru nauli basa.

 

7) Songgop ma anduhur titi, sangkot diparjenggaran;
Mangasi ma Mulajadi, unang adong abor lias ma parmaraan.

 

8) Hau sibane-bane, dongan ni sibandaulu;
Begu so ra mangalele, musu pe so jadi mamunu.

 

9) Giring-giring gosta-gosta, sangkot dipandingdingan;
Sahala mangiring-iring, mangompa-ompa, manjampi parsaulian.

 

10) Rimpur jala hibul do, hau sibaenon bungkulan ni ruma;
Tomburan do ianggo boru, panungkunan ma hula-hula.

 

11) Hot ma diparbatuna, togu diransangna;
Momos ma ijuk dipangarahutanna, gopas disolang-solangna;

12) Jumadi jabu namarampang namarjual sigomgom pangisina.
Hasorangan ni anak sibulang-bulangan dohot boru namartua.

 

13) Tampulan sibaganding, Diatas na pangiringan;
Tu gabe na ma hamu saluhutna, Tondi muna sai masipairing-iringan.

 

14) Sinuan hariara bahen partungkoan di tonga ni huta,
Sinur ma napinahan tugabena naniula;

15) Nadihuta unang marmara,
Horas-horas ma hamu Sasude tumpakon ni Tuhanta Namartua.

 

16) Tangki ma jala walang, Galinggang jala garege;
Tubu ma anak partahi jala ulubalang, Dohot boru maduma jala pareme.

 

17) Tubu ma sanggar di holbung-holbung, Tubu arung di honuk-honuk;
Tubu ma dihamu anak namalo marpollung, Dohot boru namalo marsonduk.

 

18) Andor ris ma andor ras, Didolok ni lobutua;
Torkis-torkis ma horas-horas, Jala dapotan tua.

 

19) Pinantikkon hujur, Tu julu ni topian;
Horas ma hamu saluhut, Jala dapotan pansarian.

 

20) Balintang ma pagabe, Tumundalhon sitadoan;
Ari mu ma gabe, Asal ma hamu masipaolo-oloan.

 

21) Pir ma Pokki, Bahul-bahul pansalongan;
Pir ma tondi, Jala luma panamotan.

 

22) Dangka ni sitorop, Pinanghait-haithon;
Tubu ma anak dohot boru, Sitongka panahit-nahiton.

 

23) Eme si tamba tua ma, parlinggoman ni si borok,
Amanta Debata do Si lehon tua; saluhut na ma hitaon diparorot.

Read More

ANGKA UMPASA NA ASING

 

1) Martahuak ma manuk, di bungkulan ni ruma;
Horas ma hula-hulana, songoni nang akka boruna.

 

2) Simbora ma pulguk, pulguk di lage-lage;
Sai mora ma hita luhut, huhut horas jala gabe.

 

3) Sinuan bulu, sibahen na las;
Tabahen uhum, mambahen na horas.

 

4) Eme ni Simbolon, parasaran ni si borok;
Sai horas-horas ma hita on, laos Debata ma na marorot.

 

5) Sititik ma sigompa, golang-golang pangarahutna;
Tung so sadia pe naeng tarpatupa, sai anggiat ma godang pinasuna.

 

6) Pinasa ni Siantar, godang rambu-rambuna;
Tung otik pe hatakki, sai godang ma pinasuna.

 

7) Tuat si puti, nakkok sideak;
Ia i na ummuli, ima ta pareak.

 

8) Aek godang, tu aek laut;
Dos ni roha, sibaen na saut.

 

9) Marmutik tabu-tabu, mandompakhon mataniari;
Sai hot ma di hamu akka pasu-pasu, laho marhajophon akka na sinari.

 

10) Bona ni pinasa, hasakkotan ni jomuran;
Tung aha pe dijama hamu, sai tong ma dalan ni pasu-pasu.

 

11) Mandurung di aek Sihoru-horu, manjala di aek Sigura-gura;
Udur ma hamu jala leleng mangolu, hipas matua sonang sora mahua.

Read More

UMPASA MANGAMPU

 

1) Bulung ni taen, tu bulung ni tulan;
Ba molo tarbahen, sai topot hamu hami sahali sabulan,

 

2) Molo so boi bulung ni tulan, pinomat bulung ni salaon;
Ba molo so boi sahali sabulan, pinomat sahali sataon.

 

3) Ni durung situma, laos dapot pora-pora;
Molo mamasu-masu hula-hula mangido sian Tuhan, Napogos hian iba, boi do gabe mamora.

4) Songgop si ruba-ruba, tu dakka ni hapadan;
Angka pasu-pasu na ni lehon muna, Sai dijangkon tondi ma dohot badan.

 

5) Mardakka Jabi-jabi, marbulung ia si tulan;
Angka pasu-pasu na pinasahat muna, Sai sude mai dipasaut Tuhan.

 

6) Naung sampulu sada, jumadi sampulu tolu;
Angka pasu-pasu pinasahat muna, Sai anggiatma padenggan ngolu-ngolu.

 

7) Naung sapulu pitu, jumadi sapulu ualu;
Angka pasu-pasu pinasat muna hula-hula nami, Diampu hami ma di tonga jabu.

 

8) Turtu ninna anduhur, tio ninna lote;
Angka pasu-pasu pinasahat muna, Sai unang ma muba, unang mose.

 

9) Habang pidong sibigo, paihut-ihut bulan;
Saluhut angka na tapangido, sai tibu ma dipasaut Tuhan.

 

10) Tinapu bulung nisabi, baen lompan ni pangula;
Sahat ma pasu-pasu na nilehon muna i tu hami, Sai horas ma nang hamu hula-hula.

 

11) Suman tu aek natio do hamu, riong-riong di pinggan pasu,
Hula-hula nabasa do hamu, na girgir mamasu-masu.

 

12) Obuk do jambulan, nidandan ni boru Samara;
Pasu-pasu na mardongan tangiang sian hula-hula, Mambahen marsundut-sundut soada mara.

Read More

UMPASA TU NA BARU MARBAGAS ( UNTUK PASANGAN YANG BARU MENIKAH )

 

1) Dakka ni arirang, peak di tonga onan;
Badan muna naso jadi sirang, tondi mu marsigomgoman.

 

2) Giring-giring ma tu gosta-gosta, tu boras ni sikkoru;
Sai tibu ma hamu mangiring-iring, huhut mangompa-ompa anak dohot boru.

 

3) Rimbur ni Pakkat, tu rimbur ni Hotang;
Sai tudia pe hamu mangalakka, sai tusima hamu dapot pansamotan.

 

4) Dekke ni sale-sale, dengke ni Simamora;
Tamba ni nagabe, sai tibu ma hamu mamora.

 

5) Sahat-sahat ni solu, sahat ma tu labuan;
Sahat ma hamu leleng mangolu, jala sai di dongani Tuhan.

 

6) Sahat solu, sahat di parbinsar ni ari;
Leleng ma hamu mangolu, jala di iring-iring Tuhan ganup ari.

 

7) Mangula ma pangula, dipasae duhut-duhut;
Molo burju marhula-hula, dipadao mara marsundut-sundut.

 

8) Ruma ijuk, tu ruma gorga;
Sai tubu ma anak muna na bisuk, dohot borumuna na lambok marroha

 

9) Anian ma pagabe, tumundalhon sitodoan;
Ari muna gabe, molo marsipaolo-oloan.

 

10) Gadu-gadu ni Silindung, tu gadu-gadu ni Sipoholon;
Sai tubu ma anak muna sampulu pitu, dohot boru muna sampulu onom.

 

11) Bintang na rimiris ma, tu ombun na sumorop;
Asa anak pe antong di hamu riris, boru pe antong torop.

 

12) Tubuan laklak ma, tubuan sikkoru di dolok ni Purbatua;
Sai tubuan anak, tubuan boru ma hamu, donganmu sarimatua.

 

13) Pir ma pongki, bahul-bahul pansalongan;
Sai pir ma tondi muna, jala tongtong hamu masihaholongan.

 

14) Pinantik hujur, tu jolo ni tapian;
Tusi hamu mangalangka, tusi ma dapot parsaulian.

 

15) Tangki jala hualang, garinggang jala garege;
Tubuan anak ma hamu, partahi jala ulubalang, Tubuan boru par mas jala pareme.

 

16) Tubu ma hariara, di tonga-tonga ni huta;
Tubu ma anak dohot borumu, Na mora jala na martua.

 

17) Sahat-sahat ni solu, ma sahat tu bontean;
Pasahaton nami ma ulos si ganjang rambu on. Sahat ma hamu tu parhorasan, sahat tu panggabean.

Read More

UMPASA MANJALO TINTIN MARANGKUP ( UNTUK PASANGAN SAAT TUKAR CINCIN )

 

1) Bulung namartampuk, bulung ni simarlasuna;
Nunga hujalo hami tintin marangkup, dohonon ma hata pasu-pasuna :

 

2) Hot pe jabu i, tong doi margulang-gulang;
Sian dia pe mangalap boru bere i, tong doi boru ni Tulang.

 

3) Sai tong doi lubang, nang pe dihukkupi rere;
Sai tong doi boru ni Tulang, manang boru ni ise pei dialap bere.

 

4) Amak do rere, dakka do dupang;
Anak do bere, Amang do Tulang.

 

5) Asing do huta Hullang, asing muse do huta Gunung Tua;
Asing do molo tulang, asing muse do molo gabe dung simatua.

Read More

UMPASA NI NAPOSO BULUNG ( BUAT ORANG-ORANG MUDA )

1) Jolo tiniptip sanggar, laho bahen huru-huruan;
Jolo sinukkun marga, asa binoto partuturan.

 

2) Tudia ma luluon, da goring-goring bahen soban;
Tudia ma luluan, daboru Tobing bahen dongan.

 

3) Tudia ma luluan, da dakka-dakka bahen soban;
Tudia ma luluan, da boru Sinaga bahen dongan.

 

4) Silaklak ni randorung, tu dakka ni sila-sila;
Ndang iba jumonok-jonok, tu naso oroan niba.

 

5) Ramba na poso, ndang piga tubuan lata;
Hami na poso, ndang piga na umboto hata.

 

6) Metmet dope sikkoru, da nungga dihandang-handangi;
Metmet dope si boru, da nunga ditandang-tandangi.

 

7) Torop do bintang di langit, si gara ni api sada do;
Torop do si boru nauli, tinodo ni rohakku holan ho do.

Read More

UMPASA DI NA LAHO MARSIRANG

 1. Pidong Sitapi-tapi, habang diatas hauma;

Horas ma hamu na hupaborhat hami, horas hami na tininggalhon muna.

2. Dolok ni Panampahan, tondongkon ni Tarabunga;

Sai horas ma hamu di pardalanan songon i dung sahat tu inganan muna.

3. Tombak ni Sipinggan di dolok ni Sitapongan;

Di dia pe hita tinggal, sai tong ma hita masihaholongan.

4. Eme sitambatua parlinggoman ni siborok;

Amanta Debata do silehon tua, sai luhutna ma hita diparorot.

5. Mangerbang bunga-bunga, ditiur ni mata ni ari;

Salamat jalan ma di hamuna, salamat tinggal ma di hami.

Read More

UMPASA DI TINGKI MANGAPULI

 Jotjot do tadok:

Tua na so taraithon;
Soro ni ari na so tarhoishon.

 

Alai dumenggan do dohonon umpasa on

1. Ramba ni Sipoholon marduhut-duhut sitata;
    Las ni roha dohot sitaonon sude do i sian Amanta Debata.

 

2. Asa:

Hau ni Gunungtua, dangkana mardagul-dagul;
Tibu ma dilehon Tuhanta di hamu tua, jala tibu hamu diapul-apul.

 

3. Poltak bulan tula, binsar ia mata ni ari;
Tibu ma ro tu hamu soritua, singkat ni soro ni ari.

 

4. Angkup nii:

Hotang binebe-bebe, hotang pinulos-pulos;
Unang iba mandele, godang do tudos-tudos.

 

5. Tambana muse:

Hotang binebe-bebe, hotang ni Siringkiron; Unang iba mandele, ai godang dope sihirimon.

6. On pe:

    Dolok ni Simalungun ma tu dolok ni Simamora Sai salpu ma angka na lungun, hatop ma ro silas ni roha.

7. Bagot namadungdung, Tupilo-pilo namarajar;
    Dao ma nalungun, Sai ro ma na jagar tu joloan on.
 
8. Dolok ni Simalungun, tu dolok ni Simamora;
    Salpu ma sian hamu na lungun, sai hatop ma ro si las ni roha.
    
9. Bagol bogil, Bagol so habal-balan;
    Salpu ma nahansit, Sai ro ma najagar tujoloan on.

Read More

UMPASA SIDOHONON MOLO DOHOT IBA MANGADOPI NATUA-TUA NA MANJALO SIPANGANON SIAN ANGKA ANAKKONNA

 Hata tu natua-tua i sian angka anakkonna:

1. Andor halumpang ma togutogu ni lombu dohot togu-togu ni horbo laho tu Lapogambiri.

Sai saur ma hamu leleng mangolu paihut-ihut pahompu sahat tu na marnono dohot marnini.

2. Tinapu bulung ni sabi nibutbut pinaspashon; I dope na tarpatupa hami ba i ma jolo tahalashon.

 

Hata sian undangan tu natua-tua i:

1. Poltak bulan i Ama ni Manggule;

Ro nuaeng angka pomparanmu mamboan sipanganon ba dohot hami maulae.

2. Tubu ma singkoru di dolok ni Simamora;

Sai torop ma anak dohot boru na basa jala sisubut roha.

3. Tubu dingin-dingin jonok tu simartolu;

Horas ma tondi madingin pir tondi matogu;

Sai ro ma nipi na uli sai leleng hamu mangolu.

Haliangan ni nono dohot nini raphon anak dohot boru.

 

Hata ni undangan tu ianakkon na mamboan sipanganon:

1. Binolus Purbatua laho tu Parsingkaman;

Na burju marnatua-tua ingkon sai dapotan pandaraman. Laho pe ibana mangula sai na dao ma parmaraan, Sai dapotsa na niluluan sai jumpang na jinalahan.

2. Taringot di sipanganon na binoan muna tu natua-tua i:

Disi do gandina, disi do nang gandona;

Disi do daina disi do nang tabona,

Sirsir ansimna jala hona dohot asomna.

3. Asa dohononnami ma :

Bagot na marhalto ma di ladang ni Panggabean;

Horas ma hami na manganhon, lam martamba sinadongan di hamu na mangalean.

4. Ia siula tano do hamu ba on ma dohonon nami:

Binanga ni Sihombing binongkak ni Purbatua;

Tu sanggar ma amporik tu lombang ma satua; Sai sinur ma pinahan gabe na niula.

5. Molo partigatiga do hamu ba on ma dohonon nami:

Tinampul bulung bira bahen saong laho tu ladang;

Sai mangomo ma hamu sian tiga-tiga ba sai maruntung ma sian dagang.

6. Molo tung sipata rugi hamu ba sai dapot nian nidok ni umpasa:

Soban ranting-ranting soban ni Sijamapolang;

Ba molo rugi hamu sian anting-anting, ba sai mangomo ma sian golang.

7. Molo pegawai do hamu ba on ma dohononnami:

Tinapu bulung salaon dongan ni bulung situlan;

Bai sai naek pangkat ma hamu ganup taon, sai tamba gaji tiap bulan.

8. Molo adong sian hamu na so hot ripe dope on ma dohonon nami:

Parik ni Lobutua hatubuan ni bulu duri;

Na burju marnatua-tua sai ingkon dapotan rongkap na uli.

9. Ba angkup ni i:

Molo adong disi huling-kuling sai adong ma disi nang holi-holi; Molo adong disi na so muli sai adong do rongkap ni i naso mangoli.

10. Sahat-sahat ni solu ma sahat di rondang ni bulan: Sai leleng ma hamu mangolu jala sai dipasu-pasu Tuhan.

Read More

ANGKA UMPASA MANGAMPU ANGKA PASU-PASU NI HULA-HULA

 1. Doding ni doding, doding ni Mandalasana, Angka pasu-pasu muna i sai unang ma muba unang sesa.

2. Naung sampulu sada ma jumadi sampulu tolu; Angka pasu-pasu muna i sai anggiat ma padenggan ngolu-ngolu.

3. Naung sampulu pitu jumadi sampulu ualu; Angka pasu-pasu muna i sai hot ma i di tonga ni jabu.

4. Topi ni Aek Puli dalan tu huta Tonga-tonga; Sai sahat ma pasu-pasu muna i, unang muba unang longa.

5. Songgop siru baruba tu dangka ni hapadan, Angka pasu-pasu muna i sai dijangkon tondi ma dohot badan.

6. Mardangka jabijabi marbulung ia situlan; Angka pasu-pasu muna i sai sude ma i dipasaut Tuhan.

7. Bulung ni taem ma tu bulung ni situlan; Ba molo tarbahen sai topot hamu hami ganup bulan.

8. Ba molo so boi bulung situlan ba pinomat bulung salaon; Ba molo so boi ganup bulan pinomat tolu hali sataon.

Read More

UMPASA HATA PODA DOHOT PASUPASU SIAN PARBORU TU HELA DOHOT BORUNA

 1. Parasaran ni misang tombak ni Panggabean; Sai masiamin-aminan ma hamu songon lampak ni pisang, sai masitungkol-tungkolan songon suhat di robean.

2. Aek sihoru-horu di toru ni dolok Martimbang; Rap manimbung ma hamu ia to toru, rap mangangkat ia tu ginjang.

3. Napuran ni Lumbanjulu tu gambir ni Pahae; Rap mangalangka ma hamu ia tu julu, rap mangambe ia tu jae.

4. Tu ho boru hasian dohononhu ma:

Molo ogung na mabola, pintor dipaboa do luhana;

Molo parumaen na marroha pintor dibuat do roha ni simatuana.

5. Sibigo ambora rara huling-hulingna;

Gabe uli do parrupa na roa, asal ma sai lambok pangkulingna.

 

Angka pasu-pasu:

1. Tubu ma singkoru di lambung ni tandiang; Sai tibu ma hamu marurat tu toru jala tibu marbulung tu ginjang.

2. Na hinunti hirang marisi gadong sipapua; Badanmuna ma na so ra sirang sahat tu na saurmatua.

3. Tinampul bulung salak laos hona bulung singkoru; Sai tibu ma hamu paabingabing anak jala tibu mangompa boru.

4. Horbo ni sibuluan manjampal di balian; Sai manumpak ma di hamu Tuhan, sai tiur nang pansarian.

Read More

ANGKA UMPASA DI TINGKI TINGKIR TANGGA

 Sian parboru:

1. Tubu ma singkoru di toru ni tandiang; Asa denggan na martondong ingkon masitopot-topotan do songon pidong liang.

Lam denggan ma ngolu-ngolu jala mokmohan na marniang.

2. Sinuan lata ni sabi di ladang ni Sitapongan; Doshon sataon do sadari molo so niida na hinaholongan.

3. Tubu hau ingol di tombak ni Simalungun; Ala hami nunga masihol, ba ro hami marubat lungun.

4. Naeng huhut berengon nami:

Sitolmok do i ulaning, manang na pusuk ni tandiang;

Mokmok do hela dohot borunami, manang na naung marniang.

5. Alai nunga las rohanami ai:

Inggir-inggir do hape parasaran ni satua;

Tung hipas do nasida hape, jala soada mahua.

Read More