ANGKA UMPASA DI TINGKI PESTA UNJUK

Tulang ni hela:

1. Bulung na matampuk, bulung ni si marlasuna;

Nunga hujalo jambar tintin marangkup, dohonon ma hata pasu-pasuna.

2. Hot pe jabu i sai tong do i margulang-gulang;

Tung sian dia pe mangalap boru bere i, sai hot do i boru ni tulang.

3. Sai tong do i lubang nang pe dihungkupi rere;

Sai hot do i boru ni tulang manang na boru ni ise pe dialap bere.

4. Laklak ma diginjang pintu singkoru ginolom-golom;

Sai maranak ma nasida sampuluh pitu, marboru sampulu onom.

5. Urat ni nangkat ma tu urat ni hotang;

Tu dia pe nasida mangalangka ba sai disi ma nasida dapotan.

 

UMPASA DOHOT HATA PASU-PASU SIAN PARBORU DI NA PASAHAT ULOS TU NATORAS BORU NI HELA

1. Ramba poso dope ito parumaenmi na so tubuan lata;

Halak na poso dope parumaenmi, na so umboto agiaha,

2. Marmutik ma lasiak dompak mata ni ari;

Malo ma ho ito manganju parumaenmi, arian nang bodari.

3. Andor halumpang ma togu-togu ni lombu;

Sai saur matua ma itongku pairing-iring pahompu.

 

HATA UMPASA NI PARBORU DI TINGKI MANGULOSI AMA NI HELA.

1. Dolok ni Purbatua donok tu Siborotan,

Sai saur ma hamu sarimatua jala tiur nang pansamotan.

2. Tubu ma tambinsu di toru ni pinasa;

Sai torop ma tubu di hamu angka pahompu na bisuk huhut na uli basa.

3. Hau simartolu ditombak ni Panamparan;

Sai leleng ma hamu mangolu dihaliangi angka pomparan.

4. Eme na marbiur dilambung ni hariara;

Sai matorop ma pomparan muna jala maribur huhut matakkang jala manjuara.

 

HATA UMPASA NI PARBORU DI NA MANGULOSI HELANA DOHOT BORUNA.

1. Di ginjang ma ia arirang, di toru ia panggonggoman,

Badan muna ma na so ra sirang, tondi muna sai masigomgoman.

2. Tangki jala ualang, galinggang jala garege;

Sai tubu ma dihamu angka anak partahi jala ulubalang dohot angka boru na mora jala pareme.

3. Eme sitambatua parlinggoman ni siborok,

Sai dilehon Amanta Debata ma di hamu tua, jala sai tongtong ma hamu diparorot.

4. Sahat-sahat ni solu sahat ma tu Tigaras; Saur ma hamu leleng mangolu gabe jala horas.

 

ANGKA UMPASA NA ASING.

1. Aek sihoru-horu tu sampuran Sigura-gura;

Rap leleng ma hamu mangolu, gabe jala sarimatua.

2. Binsar mata ni ari poltak mata ni bulan;

Sai tubu ma di hamu angka boru na malo mansari dohot angka anak na gabe raja panungkunan.

 

HATA UMPASA NI DONGAN SAHUTA SIBAGI OLOP-OLOP.

1. Balintang ma pagabe tumandangkon sitadoan.

Saut ma angka ianakkonta i gabe ai nungga saut hita masipaoloan.

2. Aek Siuruk-uruk tu silanlan aek Toba;

Ndang adong be na marungut-ungut, nungga sude hita marlas ni roha.

3. Bintang ma na rumiris tu ombun na sumorop, toho di rondang ni bulan;

Anak pe antong di nasida sai riris, boru pe torop, angka sioloi Tuhan.

4. Simbora gukguk rarak diatas amak. Mamora ma hita luhut, torop ma boru dohot anak.

 

ANGKA UMPASA SIDOHONON DI TINGKI NA MANGULOSI PENGANTEN

Opat-opat do i sasitel asa lengkap i ma na sumintahon:

Asa hot parsaripeon i.

Asa gabe.

Asa sahat sintasinta i.

Asa denggan pansarian.

 

1.

a. Di ginjang do arirang, di toru panggonggoman;

Badan muna ma na so sirang, tondi muna sai masigonggoman.

b. Giring-giring ma tu gosta-gosta, tu boras ni singkoru, Sai tibu ma hamu mangiring-iring, tibu mangompa-ompa angka anak dohot boru.

c. Rimbur ni pangkat ma tu rimbur ni hotang; Tung aha pe dijama hamu, sai i ma parohon pansamotan.

d. Sahat-sahat ni solu sahat ma tu bontean;

Sahat ma hamu leleng mangolu, sahat tu panggabean.

 

2.

a. Mandurung di Aek Natolu manjala di Sigura-gura;

Rap leleng ma hamu mangolu, sahat tu na saur matua.

b. Laklak di ginjang pintu, singkoru ginolom-goloman;

Maranak ma hamu sampulu pitu marboru sampulu onom.

c. Hotang hotari tu hotang simarhora-hora;

Sai gogo ma hamu mansari, jala tibu ma hamu mamora.

d. Sahat-sahat ni solu sahat ma tu Tigaras;

Sahat ma hamu leleng mangolu, gabe jala horas.

 

3.

a. Napuran ni Parsoburan tu gambir ni Sitapongan,

Tangkas ma hamu sai sauduran jala sai masihaholongan.

b. Tubu ma tambinsu di toru ni pinasa;

Sai tubu ma dihamu angka anak na bisuk, dohot angka boru na ulibasa.

c. Andor has tu andor his tu andor simartolu;

Sai rap horas ma hamu rap torkis, jala sai dapot ngolu-ngolu.

d. Sahat-sahat ni solu sahat ma tu labuan

Sahat ma hamu leleng mangolu, sai diiring-iring Tuhan.

 

4.

a. Tali pintu tolu, ihot ni ogung oloan; Rap leleng ma hamu mangolu jala sai satahi saoloan.

b. Binsar mata ni ari, poltak mata ni bulan;

Sai tubu ma di hamu angka boru na malo mancari, dohot angka anak na gabe raja panungkunan.

c. Bona ni aek Puli di dolok Sitapongan,

Sai roma tu hamu angka na uli, jala sai dor nang pansamotan.

d. Sahat-sahat ni solu, sahat di rondang ni bulan,

Rap sahat ma hamu leleng mangolu, jala rap sioloi Tuhan.